Stofa
N102

Náttúra og menning II

Litlir landkönnuðir á Selfossi
Bragi Guðmundsson, prófessor við HA, Helena Sjørup Eiríksdóttir og Sara Guðjónsdóttir, MEd nemar við HA 

Náttúrulegt umhverfi spilar stórt hlutverk í hverju samfélagi og mikilvægt er að nýta það vel í kennslu þar sem það býður upp á fjölbreytta möguleika. Með því að samtvinna bóklestur og kennslu úti í umhverfinu, til að mynda í vettvangsferðum, verður til árangursrík aðferð við að tengja nútíð við fortíð. Í erindi okkar kynnum við vefsíðu sem inniheldur hugmyndir að útikennslu og sögutengdum viðfangsefnum ásamt verkefnum sem tengjast bæjarfélaginu Selfossi. Vefsíðan er gagnagrunnur fyrir leikskóla og kennara á Selfosssvæðinu þar sem markmiðum aðalnámskrár um grunnþætti menntunar, námssviðum og hæfniviðmiðum er mætt. 

Menning býr í náttúrunni 
Bragi Guðmundsson, prófessor við HA 

„Landslag væri lítils virði ef það héti ekki neitt,“ sagði Tómas. Örnefni eru mikilvægur þáttur í menningu og náttúrulegu umhverfi okkar. Sum eru eyktamörk dregin af innbyrðis afstöðu himintungla, önnur vitna um búsæld eða barning, enn önnur tengjast trúariðkun, útliti eða lögun náttúrulegra fyrirbæra, o.s.frv. Allir nota örnefni að einhverju marki en hvernig getum við nýtt þau til náms og kennslu með börnum og unglingum? Í erindinu verða tekin dæmi úr bæjarlandi Akureyrar um örnefni af ólíkum toga og bent á nokkrar leiðir til þess að nota þau sem vegvísi að fjölþættum skilningi á næsta nágrenni þeirra sem bæinn byggja. 

Netfang: bragi@unak.is

Stofa
M202

Sýndartilraunir í eðlis- og efnafræðikennslu - Tengsl hugmynda og veruleika
Haukur Arason, dósent við Menntavísindasvið HÍ

Öll náttúrufræðikennsla snýst á einhvern hátt um tengsl hugmynda og veruleikans, fræðilegar hugmyndir náttúrufræða eiga að lýsa og útskýra raunveruleg fyrirbæri. Þetta samspil endurspeglast í tengslum verklegrar og fræðilegrar kennslu. Sýndartilraunir (e. virtual laboratory, interactive simulation) eru kostur sem náttúrufræðikennurum býðst í æ ríkari mæli. Þar kemur til útbreiðsla tölvutækni í skólum ásamt framboði á sýndartilraunum. Sýndartilraunir eru í einhverjum skilningi millistig milli fræðilegra hugmynda og veruleikans. Í erindinu verður fjallað um það hvernig nýta má sýndartilraunir í eðlis- og efnafræðikennslu, þá möguleika sem þær bjóða upp á, þá kosti og galla sem þær geta haft og samspil þeirra við fræðilega kennslu og verklega kennslu.

Netfang: arason@hi.is

Stofa
M203

DILE – upplýsingatækni í leikskólum á Norðurlöndum
Svava Pétursdóttir, lektor við Menntavísindasvið HÍ 

Upplýsingatækni býður upp á nýjar leiðir í námi og skapandi starfi á öllum skólastigum og á allra síðustu árum hafa sveitarfélög, mörg hver, lagt aukna áherslu á möguleika fólgna í notkun fartækni í leikskólastarfi, spjaldtölvur og snjallsíma, og raunar fleira tengt tækni í skapandi leik. Samstarfsnet byggt á NordPlus-verkefninu DILE (Digital Learning in Preschool) hefur leitast við að þróa og rannsaka notkun stafrænna verkfæra í leikskólum. Þátttakendur eru leikskólakennarar, stjórnendur leikskóla á sveitarstjórnarstiginu og rannsakendur frá öllum Norðurlöndunum. Til að kortleggja og efla notkun á spjaldtölvum og öðrum stafrænum verkfærum í leikskólum eru rýnd fyrirliggjandi skrif, leikskólar og háskólar í fimm löndum sóttir heim, rætt við starfsfólk og skipst á hugmyndum og reynslusögum á alþjóðlegum fundum, samfélagsmiðlum og þar til gerðum vef. Þróunarstarf og tilraunir hafa gefist vel; tæknin kemur að miklu gagni í sérkennslu og í almennu starfi gengur vel að ýta undir ýmiss konar ígrundun barnanna, samskipti, miðlun og sköpun, ekki síst með myndatökum og ýmsu sem þeim tengist. Tæknin kemur líka að góðum notum við skráningu á uppeldisstarfinu og í samstarfi við foreldra. Hér verður sagt frá ýmsu því sem verkefnið hefur skilað og greint frá helstu leiðum sem leikskólakennararnir hafa farið við að flétta stafræna tækni inní starfið í leikskólanum.

Netfang: svavap@hi.is

Stofa
L202

Nýtt alþjóðlegt námskeið, tilurð, þróun og upplifun nemenda
Vera Kristín Vestmann Kristjánsdóttir, aðjúnkt við HA og Hafdís Björg Hjálmarsdóttir, lektor við HA

Stofa
L203

Skólar á grænni grein - Áfangi í umhverfisstjórnun á framhaldsskólastigi
Katrín Magnúsdóttir, sérfræðingur hjá Landvernd og Margrét Auðunsdóttir, framhaldsskólakennari við Verzlunarskóla Íslands

Stofa
L102

Opin stundartafla og samþætting námsgreina
Ingibjörg Stefánsdóttir, Íris Aðalsteinsdóttir, Ursula Ásgrímsdóttir og Berglind Þráinsdóttir, grunnskólakennarar í Grundaskóla á Akranesi

Í vetur hafa kennarar á unglingastigi í Grundaskóla kennt eftir opinni stundatöflu með áherslu á samþættingu námsgreina. Með opinni stundatöflu er átt við að engar námsgreinar eru fastar í töflu heldur er stundataflan hönnuð utan um verkefnin hverju sinni. Með þessum hætti gefst nemendum tækifæri til að öðlast dýpri og betri skilning á náminu. Viðfangsefnin hafa verið fjölbreytt og með þvi að nálgast námið á þennan hátt sjá nemendur oft aukinn tilgang með náminu.  Einnig höfum við fengið töluvert af gestum til okkar frá félagasamtökum og úr atvinnulífinu í tengslum við þau viðfangsefni sem við erum að vinna.

Með því að hafa þetta svigrúm sem opin stundatafla veitir verður náttúrufræðikennslan mun markvissari og skemmtilegri. Tæknina höfum við líka nýtt í þessum verkefnum ýmist til að kafa dýpra í efnið eða til að auka möguleika á skapandi verkefnaskilum. Námsmatið hefur einnig verið af ýmsum toga, þar sem nemendur, foreldrar og kennarar koma að matinu.

Í erindinu munum við einnig fara yfir hvað hefði mátt gera betur. Hvaða ljón eru í veginum og hvert viljum við stefna.

Netfang: ingibjorg.stefansdottir@grundarskoli.is