Samræðuþing um samræður í skólastarfi

Kennarar á samræðuþingi

Fimmtudaginn 12. maí var haldið samræðuþing í Háskólanum á Akureyri. Á þinginu voru saman komnir kennarar sem hafa sýnt hafa samræðum í skólastarfi áhuga og unnið að því að efla samræður til náms með nemendum sínum. Upphaflega var þingið hugsað sem eins konar uppskeruhátíð fyrir þá kennara sem unnið hafa að rannsóknar- og þróunarverkefninu Hugleikur - samræður til náms sl. tvö ár og ákvað hópurinn að opna þingið og bjóða öllum þeim sem áhuga hafa á samræðum að koma og taka þátt. Alls voru þinggestir ásamt fyrirlesurum 43. Kennararnir komu frá 8 skólum á Akureyri og af öllum skólastigum. Þingið tókst vel og þökkum við öllum þeim sem komu kærlega fyrir þátttökuna.

Myndir frá þinginu.

Í vor eru tvö ár liðin frá því að þróunarverkefnið Hugleikur samræður til náms hófst. Markmið verkefnisins er að læra um samræðuaðferðir og auka færni þátttakenda í að nota aðferðirnar á vettvangi með nemendum, í því skyni að efla hæfni þeirra til að draga ályktanir og skapa merkingu, spyrja rannsakandi og gagnrýninna spurninga og taka upplýsta afstöðu í samræðum. Nú er fyrsta áfanga verkefnisins lokið og af því tilefni bauð þróunarhópurinn, kennaradeild HA og miðstöð skólaþróunar HA til þingsins sem helgað var samræðum í skólastarfi.  

Þingið var endurgjaldslaust.

Fyrirhugað er að bjóða skólum verkefnið skólaárið 2016-2017 og rannsaka árangur þess. Þeir skólar sem áhuga hafa á því að vera með næsta skólaár vinsamlega hafið samband (sz@unak.is) og fáið nánari upplýsingar.

Verkefnið Hugleikur samræður til náms er styrkt af Háskólasjóði KEA, Rannsóknasjóði HA og samræðuþingið var styrkt af Verkefnasjóði um styrk Akureyrarbæjar til Háskólans á Akureyri.