Hugmyndaflugið er það eina sem bindur þig

Dagana 7. og 9. desember sl. voru haldin tvö forritunarnámskeið í Háskólanum á Akureyri fyrir kennara á svæði Eyþings. Um var að ræða þróunarnámskeið í verkefninu Skapandi skólastarf en það er samstarfsverkefni Eyþings og Háskólans á Akureyri. 

Markmið Skapandi skólastarfs er m.a. að styðja leik-, grunn- og framhaldsskólakennara á Norðurlandi eystra við að þróa starfshætti sína í anda íslenskrar menntastefnu og grunnþátta hennar með sérstakri áherslu á skapandi hugsun, tækni og virkni. Hlutverk Háskólans á Akureyri í verkefninu er að leggja til kennslufræði- og tæknilega ráðgjöf um hvernig hægt er nýta tækni á skapandi hátt í skólastarfi og auka hæfni kennara og nemenda til að takast á við áskoranir á þeim sviðum. 

Á fyrra námskeiðinu lærðu þátttakendur að nota vefsíðuna Code.org og forrita verkefni síðunnar og á seinna námskeiðinu lærðu þátttakendur að forrita Micro:bit. Námskeiðin voru ætluð byrjendum í forritun og alls tóku 12 áhugasamir kennarar þátt og þökkum við þeim kærlega fyrir þátttökuna, góða samveru, endurgjöf og mat. 

Raddir þátttakenda að loknum námskeiðum

Í Micro:bit forritun felst frelsi og hugmyndaflugið er það eina sem bindur þig.
Opnaði augu mín um möguleika Micro:bit.
Fengum að prufa og líka sjá hvernig hægt er að taka forritun á næsta skref (aukahlutir). Þetta er skemmtileg viðbót við nám/kennslu.
Góðir kennarar og gott andrúmsloft.
Ég vissi ekkert um foritun og lagaðist kunnátta mín mikið.
Þörf á fræðslu og kennslu í forritunarvinnu fyrir börn.
Farið nógu rólega yfir fyrir byrjendur, og ekki gert ráð fyrir að maður kunni allt saman. Gaman líka að sjá hvernig allir hjálpuðust að.

Fleiri námskeið á döfinni

Eftir áramót verður óskað eftir kennurum til að taka þátt í þróunarnámskeiðum í forritun t.d. Sphero og þá verður fókusinn einnig á forritun fyrir yngsta skólafólkið og kennt á Kubb (cubetto) og Osmo (coding). Eins og áður eru námskeiðin ætluð byrjendum í forritun. Fylgist með!